Rheolwr terminoleg

Cyflog: HEO: £37,111 - £45,378

Bydd cyflog cychwynnol rhwng £37,111 a £41,834 yn cael ei gynnig i’r ymgeisydd llwyddiannus, yn seiliedig ar sgiliau, gwybodaeth a phrofiad, a pherfformiad yn y cyfweliad. Ni ellir trafod yr ystod hon.

Lleoliad: Ledled Cymru (gweithio hybrid yn unol â pholisïau’r Llywodraeth). Mae gan y Gwasanaeth Cyfieithu staff yn swyddfeydd Llywodraeth Cymru yn Aberystwyth, Caerdydd, Caerfyrddin, Caernarfon a Chyffordd Llandudno. Mae swyddfeydd hefyd ym Merthyr Tudful, Penlle’r-gaer a Wrecsam.

Cytundeb: Parhaol, Llawn amser (croesewir ceisiadau gan bobl sy’n gweithio rhan-amser, fel rhan o rannu swydd neu sy’n gweithio’n llawn amser)

Dyddiad Cau: 21 Medi 2026

Dyma gyfle gwych i ymuno â Gwasanaeth Cyfieithu Llywodraeth Cymru, a chyfrannu at ein gwaith o gefnogi’r llywodraeth i gyflwyno’i rhaglen lywodraethu ac o gynorthwyo’r Gweinidogion i rannu eu negeseuon â’r cyhoedd.

PWRPAS Y SWYDD

Mae’r swydd hon yn rhan o’r uned sy’n darparu cefnogaeth, arweiniad ac adnoddau i Wasanaeth Cyfieithu Llywodraeth Cymru. Prif amcanion y swydd yw:

• Cynnal ymchwil terminolegol a rhoi cyngor arbenigol ar dermau yn y Gymraeg, yn unol â safonau ac egwyddorion cydnabyddedig.
• Cynorthwyo i ddatblygu adnoddau terminoleg blaenllaw’r Gwasanaeth Cyfieithu, gan gynnwys cronfa gyhoeddus TermCymru ac adnoddau terminoleg eraill BydTermCymru.

• Hyrwyddo arferion safonol a datblygiad o ran terminoleg ac enwau lleoedd yn y Gwasanaeth Cyfieithu ac o fewn Llywodraeth Cymru’n ehangach.

Rhoddir hyfforddiant llawn ym meysydd gwaith terminoleg ac enwau lleoedd i’r ymgeisydd llwyddiannus.

CYFLEOEDD DATBLYGU

• Datblygu ac ehangu’ch gyrfa ym maes y Gymraeg gan dderbyn  hyfforddiant llawn mewn gwaith terminoleg, sy’n ddisgyblaeth allweddol i gefnogi’r Gymraeg yn Llywodraeth Cymru a thu hwnt.
• Gweithio mewn uned unigryw sy’n darparu cefnogaeth arbenigol i wasanaeth ieithyddol mawr, amlddisgyblaeth.
• Atgyfnerthu’ch sgiliau ymchwil a dadansoddi mewn maes ieithyddol, arbenigol.
• Cefnogaeth i sefyll profion aelodaeth cymdeithasau cyfieithu proffesiynol, megis Cymdeithas Cyfieithwyr Cymru, yr ITI/IOL. Telir y ffioedd aelodaeth gan y Gwasanaeth Cyfieithu.
• Cyfle cyffrous i gyfrannu at ddatblygu maes terminoleg yn Llywodraeth Cymru, gan gynnwys datblygu rhagor ar adnoddau allweddol fel TermCymru, a rhoi syniadau newydd ar waith.

RHAGOR O WYBODAETH

Defnyddiwch y botwm "Ceisio Nawr" i fynd i wefan y Llywodraeth er mwyn gweld pecyn gwybodaeth y Gwasanaeth Cyfieithu a chael rhagor o wybodaeth am ofynion y swyddi, y meini prawf recriwtio, y broses ymgeisio a'r amserlen.