Prosiect Ailddatblygu Amgueddfa Lechi Cymru
Bydd y Rheolwr Prosiect Marchnata yn gweithio’n llawn amser yn Amgueddfa Lechi Cymru, Llanberis.
Dyma gyfle cyffrous i chwarae eich rhan yn y gwaith o drawsnewid un o amgueddfeydd mwyaf poblogaidd Amgueddfa Cymru. Bydd Prosiect Ailddatblygu Amgueddfa Lechi Cymru yn gwarchod, yn gwella ac yn dehongli safle eithriadol yr Amgueddfa Lechi ac yn creu porth Safle Treftadaeth y Byd UNESCO sy’n cefnogi sgiliau, dysgu a lles traddodiadol.
Bydd y prosiect hwn yn gweithio’n agos gyda phartneriaid gan gynnwys Cyngor Gwynedd, wrth i’r Cyngor gyflawni cynlluniau uchelgeisiol i ailddatblygu parc gwledig Parc Padarn o amgylch yr amgueddfa. Bydd y prosiect ailddatblygu yn integreiddio â datblygiadau ehangach fel rhan o weledigaeth ar gyfer twristiaeth gynaliadwy sy’n ystyried cymunedau lleol ac yn ymateb iddynt.
Mae Amgueddfa Cymru wedi ymrwymo i greu mannau newydd a gwahanol lle mae pobl yn gweld eu hunain, ac yn teimlo eu bod yn perthyn. Bydd y Prosiect yn gweithio gyda chymunedau a lleisiau lleol i greu mannau a phrofiadau ysbrydoledig sy’n cynnig persbectif unigryw ar hanes y cymunedau chwareli sydd wedi llunio’r rhan hon o Gymru. Bydd y Prosiect yn gwneud y canlynol:
1. Gwella mwynhad, mynediad a lles y cyhoedd drwy gyfrwng y profiad i ymwelwyr drwy wella cyfleusterau i bawb yn Gilfach Ddu, a chreu cyfleoedd i archwilio’r amgueddfa’n ddigidol.
2. Gwarchod ac adnewyddu’r adeiladau a’r casgliadau Gradd 1 sylweddol yn Gilfach Ddu, a diogelu a rhannu’r dreftadaeth ddiwylliannol anniriaethol drwy gadw a datblygu sgiliau traddodiadol sy’n gysylltiedig â’r diwydiant llechi.
3. Fel y porth i Safle Treftadaeth y Byd, cynyddu dealltwriaeth o ddynodiad Tirwedd Llechi UNESCO gogledd-orllewin Cymru ar gyfer cymunedau ac ymwelwyr drwy ddehongliad o’r Stori Llechi o Arwyddocâd Rhyngwladol sy’n arloesol, yn uchel ei ansawdd ac yn canolbwyntio ar y gymuned.
4. Galluogi mwy o bobl o bob cefndir i ddysgu drwy gydol eu hoes, i ddatblygu eu sgiliau ac i fod yn greadigol. Creu cyfleoedd, adnoddau a mannau ysbrydoledig a diddorol ar gyfer datblygu sgiliau crefft traddodiadol, dysgu, gwirfoddoli, cyflogaeth, lles a chreadigrwydd.
5. Gwneud yn siŵr bod Cynaliadwyedd Amgylcheddol wrth galon yr amgueddfa. Galluogi gwelliannau cynaliadwy a datgarboneiddio ar gyfer adeiladau a thir yr amgueddfa, yn ogystal â’i seilwaith a’i gweithrediadau. Adlewyrchu agwedd arloesol hanesyddol y safle at gynaliadwyedd yn y dehongliad.
6. Cysylltu pobl a chymunedau â chasgliadau amrywiol Amgueddfa Cymru mewn modd gwell, gan wneud yn siŵr bod pawb yn cael eu cynrychioli. Cynnwys pobl a chymunedau yn y gwaith o adrodd straeon ysbrydoledig am arwyddocâd lleol, cenedlaethol a rhyngwladol y diwydiant llechi, ei bobl a’r amgylchedd, a hynny ar y safle ac yn ddigidol.
Un o brif amcanion y prosiect yw creu enghraifft o gynaliadwyedd sy'n cefnogi cymunedau ledled gogledd-orllewin Cymru, a hynny mewn modd economaidd, cymdeithasol a diwylliannol.
Fel Rheolwr Prosiect Marchnata, byddwch yn datblygu a darparu ymgyrchoedd creadigol ac effeithiol sy'n cynyddu gwaith a gweledigaeth Prosiect Adnewyddu'r Amgueddfa Lledrith Genedlaethol.
