Y rôl

Helpwch ni i gyflawni cyfraniad Cymru tuag at y nod byd-eang o warchod 30% o amgylcheddau tir, dŵr croyw a morol erbyn 2030. Gan weithio fel rhan o waith CNC yn cynorthwyo’r Cynllun Ffermio Cynaliadwy, byddwch yn helpu i greu cynlluniau rheoli ymarferol ar gyfer safleoedd dynodedig ac yn gweithio’n uniongyrchol gyda ffermwyr i nodi camau gweithredu sy’n fuddiol i gynefinoedd, rhywogaethau a’r amgylchedd ehangach.

Rydym yn recriwtio Swyddogion yr Amgylchedd ar draws gorllewin y canolbarth, dwyrain y canolbarth a de-orllewin Cymru, am gyfnod penodol tan 31 Mawrth 2027, gyda'r posibilrwydd o barhaolrwydd. Bydd y rolau hyn wedi’u lleoli yn ein safleoedd yn Aberystwyth, y Trallwng a Plas Gwendraeth.

Byddwch yn darparu arbenigedd technegol mewn rheoli safleoedd gwarchodedig, gan gynnwys gwaith rheoleiddio (caniatadau a chydsyniadau), cyngor rhagweithiol ar gadwraeth, a datblygu partneriaethau a chytundebau rheoli. Bydd eich rôl yn cefnogi blaenoriaethau bioamrywiaeth CNC ac yn cynnig mewnbwn arbenigol i gydweithwyr a phrosiectau ar draws y sefydliad.

Efallai y byddwch hefyd yn cyfrannu at reolaeth amgylcheddol ehangach, gan gynnwys ymateb i ddigwyddiadau, rheoli adnoddau dŵr ac ansawdd tir a dŵr, a gwneud gwaith sy’n gysylltiedig â chyflawni canlyniadau’r Gyfarwyddeb Fframwaith Dŵr.

Byddwch yn gweithio ochr yn ochr â thimau gweithredol sefydledig ac yn chwarae rhan allweddol wrth wella canlyniadau amgylcheddol ar lawr gwlad.

Mae gyrru yn rhan hanfodol o'r swydd hon gan y bydd angen i chi ymweld â safleoedd anghysbell i ffurfio barn er mwyn galluogi rhoi caniatâd neu drwydded. Rhaid i chi gael trwydded yrru llawn a chyfredol y DU.

Byddwch yn cael eich contractio i’r lleoliad CNC sydd wedi’i nodi yn yr hysbyseb hon, a bydd gofyn i chi fynd yno ar gyfer cyfarfodydd rheolaidd, hyfforddiant ac ar gyfer cyfarfodydd un i un gyda'ch rheolwr. Bydd y rhain yn cael eu cynllunio ymlaen llaw.

I wneud ymholiad anffurfiol am y rôl hon, cysylltwch ag Carol Fielding at carol.fielding@cyfoethnaturiol.gov.uk

Bydd cyfweliadau’n cael eu cynnal ar Microsoft Teams.

Bydd ymgeiswyr llwyddiannus yn destun gwiriad boddhaol gan y Gwasanaeth Datgelu a Gwahardd. Fel arfer, gwneir apwyntiadau o fewn 4 i 8 wythnos i'r dyddiad cau.

Amdanom ni

Yn Cyfoeth Naturiol Cymru (CNC), mae ein gweledigaeth yn syml ond yn uchelgeisiol: creu dyfodol lle mae pobl a byd natur yn ffynnu gyda’i gilydd. Mae popeth a wnawn yn cael ei yrru gan y gred bod amgylchedd naturiol ac iach yn sail i economi gref, cymunedau gwydn, ac ansawdd bywyd llewyrchus i bawb yng Nghymru.

Rydym yn chwarae rhan ganolog wrth gefnogi Llywodraeth Cymru i ddatblygu a chyflawni’r Cynllun Ffermio Cynaliadwy, menter a gynlluniwyd i greu buddion i natur, pobl a’r economi wledig yn y tymor hir. Drwy’r gwaith hwn, rydym yn helpu i lunio dyfodol mwy cynaliadwy i amaethyddiaeth Cymru, gan sicrhau bod rheoli tir yn cefnogi bioamrywiaeth, yn mynd i’r afael â newid hinsawdd, ac yn gwella llesiant cenedlaethau’r presennol a’r dyfodol.

Mae ein timau’n angerddol, yn wybodus, ac yn rhannu’r un amcanion, sef gwarchod, adfer a gwobrwyo tirweddau ac asedau naturiol anhygoel Cymru. Os ymunwch â ni, byddwch yn rhan o sefydliad sy’n edrych at y dyfodol lle mae eich cyfraniad yn cefnogi’n uniongyrchol ddyfodol gwyrddach, tecach a mwy cynaliadwy.

Yr hyn y byddwch chi’n ei wneud

• Gweithio gydag amrywiaeth eang o gwsmeriaid mewnol ac allanol, gan gynnwys deiliaid trwydded, tirfeddianwyr, busnesau, cyrff cyhoeddus, grwpiau hamdden, gwirfoddolwyr a sefydliadau’r trydydd sector, er mwyn galluogi eraill i reoli adnoddau naturiol yn gynaliadwy.
• Sefydlu, cynnal a chynghori partneriaid i gefnogi’r gwaith o ddatblygu prosiectau a chynlluniau partneriaeth, o’r cysyniadau cychwynnol i’r adeg pan gânt eu rhoi ar waith. Bydd y prosiectau hyn yn darparu canlyniadau sy’n cyd-fynd â blaenoriaethau’r lle.
• Asesu cydymffurfedd â deddfwriaeth berthnasol ac amodau trwyddedu neu gydsynio. Pan nodir achos o beidio â chydymffurfio, penderfynu ar yr opsiwn ymyrryd mwyaf priodol a’i roi ar waith er mwyn dychwelyd i gydymffurfedd cyn gynted â phosibl. Cymryd camau gweithredu priodol ar gyfer casglu tystiolaeth at ddibenion gorfodi, yn unol â gweithdrefnau diffiniedig.
• Llunio caniatadau a chydsyniadau dilys ar gyfer gweithrediadau sy’n effeithio ar safleoedd gwarchodedig. Ar gyfer yr holl feysydd gwaith, llunio’r cyngor, yr ymchwiliadau, y dogfennau a’r adroddiadau gofynnol i safonau ansawdd cytunedig, er mwyn ategu penderfyniadau gweithredol a rheoli, hysbysiadau safleoedd gwarchodedig, ymchwiliadau cyhoeddus, achosion llys ac ati, er mwyn sicrhau bod gwybodaeth, tystiolaeth a buddiannau CNC yn cael eu cyflwyno’n fanwl gywir ac yn effeithiol.
• O fewn eich maes arbenigedd, darparu cyngor ar ymgynghoriadau ac ymatebion proffesiynol lleol i ymgynghoriadau gan dimau cynllunio a thrwyddedu. Cynnal cydberthnasau gwaith â’r timau hyn trwy gysylltiad rheolaidd.
• Monitro cynnydd gwaith, a all gynnwys dehongli data, rheoli contractwyr, cyflwyno prosiectau, neu sicrhau cydymffurfedd â chytundebau rheoli neu hysbysiadau cyfreithiol statudol. Nodi a chefnogi unrhyw gamau adfer er mwyn sicrhau y cyflawnir canlyniadau.
• Chwarae rôl o fewn gwasanaeth rheoli digwyddiadau gwydn yn CNC, sy’n dilyn prosesau’r sefydliad, er mwyn sicrhau ymatebion effeithiol, amserol a diogel i ddigwyddiadau.
• Ymgymryd â dyletswyddau a chyfrifoldebau iechyd a diogelwch sy'n briodol i'r swydd.
• Ymrwymiad i Bolisi Cyfle Cyfartal ac Amrywiaeth Cyfoeth Naturiol Cymru, ynghyd â dealltwriaeth o sut mae’n gweithredu o fewn cyfrifoldebau’r swydd.
• Bod yn ymrwymedig i'ch datblygiad eich hun trwy ddefnydd effeithiol o Sgwrs.
• Unrhyw ddyletswyddau rhesymol eraill y gofynnir amdanynt sy'n gymesur â gradd y rôl hon.

Eich cymwysterau, profiad, gwybodaeth a sgiliau

Yn eich cais a’ch cyfweliad, gofynnir i chi ddangos y sgiliau a’r profiad canlynol gan ddefnyddio dull STAR.

• Gwybodaeth dda am gadwraeth a bioamrywiaeth, gyda phrofiad penodedig yn un o’r meysydd penodol hyn o gylch gwaith y tîm.
• Dealltwriaeth o sut y gall eich rôl mewn tîm amlswyddogaethol gyfrannu at reoli adnoddau naturiol mewn modd cynaliadwy.
• Sgiliau hunanreoli, trefnu a TGCh cryf ac effeithiol, gan gynnwys y gallu i ddefnyddio systemau TG arbenigol, fel Systemau Gwybodaeth Ddaearyddol neu gymwysiadau sydd wedi’u haddasu.
• Y gallu i ddylanwadu ar bobl eraill, negodi â nhw ac ennyn eu cydweithrediad. Bydd gennych brofiad o ddelio’n llwyddiannus â phobl neu sefyllfaoedd anodd a gallu amlwg i weithio’n dda fel rhan o dîm.
• Byddwch yn sicrhau datblygiad, arbenigedd a chymhwysedd proffesiynol a phersonol parhaus, trwy ddulliau dysgu ac ardystio ffurfiol ac anffurfiol.
• Trwydded yrru lawn sy’n gyfredol a dilys yn y DU i yrru cerbydau fflyd CNC (ceir a faniau).

Gofynion y Gymraeg

Hanfodol: B2 - Lefel ganolradd uwch

Noder: Os nad ydych chi’n bodloni gofynion lefelau’r Gymraeg ar gyfer y rôl hon, ni fydd eich cais yn cael ei roi ar y rhestr fer.