Ymchwilydd

Mae swydd ymchwilydd yn gam cyntaf a phwysig o fewn cadwyn cynhyrchu cynnwys. Dyma swydd sy’n gyflwyniad i’r broses gynhyrchu aml-blatform ac yn sylfaen dda ar gyfer unrhyw un sydd ag uchelgais i ddatblygu gyrfa yn y maes.

Fel aelod o dîm o ymchwilwyr, fe fyddwch yn defnyddio amrywiaeth o ffynonellau i ddod o hyd i eitemau aml blatform, ar gyfer Prynhawn Da a Heno. Yn dilyn cymeradwyaeth gan y Tîm Cynhyrchu, fe fyddwch yn gyfrifol am drefnu lleoliad, cyfranwyr, criw ffilmio a llunio nodiadau ar gyfer y cyflwynydd/gohebydd ynghyd ag unrhyw fater arall sydd angen ei drefnu.

Prif weithle: Swyddfeydd Tinopolis yn Galeri, Caernarfon. Bydd disgwyl i’r ymgeisydd llwyddiannus deithio ar hyd a lled y Gogledd i ymchwilio a ffilmio cynnwys.

Mae Prynhawn Da a Heno yn rhaglenni byw dyddiol, felly byddwch yn gweithio dan bwysedd amser er mwyn sicrhau fod eitemau’n cyrraedd y sgrin deledu mewn pryd. Mae Heno yn darlledu’n fyw o 7:00yh tan 7:30yh, a disgwylir i un ymchwilydd weithio tan ddiwedd y darllediad bob nos.

Gall fod cyfle i ymddangos ar sgrin fel cyfrannwr neu ohebydd, neu weithio gyda golygydd i baratoi eitem. Prif waith: dod o hyd i eitemau ar gyfer y rhaglenni.

Gallwch hefyd weithio gyda rhaglenni eraill fel Pawb a’i Farn, Sgwrs dan y lloer, Carol yr ŵyl, ac ati.